স্বাস্থ্য আৰু পৰিপুষ্টি দিৱস উদযাপন

ডিব্ৰুগড় জিলাৰ লাহোৱাল উন্নয়ন খণ্ডৰ অন্তৰ্গত নিজ মৈদুমীয়া গাঁৱৰ ১ নং অংগনৱাড়ী কেন্দ্ৰত যোৱা ১৬/১০/১৯ তাৰিখে স্বাস্থ্য আৰু পৰিপুষ্টিৰ ওপৰত এখন সভা অনুষ্ঠিত হয় । উক্ত সভাত উপস্থিত থাকে লাহোৱাল স্বাস্থ্য কেন্দ্ৰৰ কৰ্মী শ্রী মাণিক গগৈ, ANM অনিমা গগৈ, নিজ মৈদুমীয়া গাঁৱৰ VHSNC কমিটীৰ সদস্যসকল, ৱাৰ্ড কমিছনাৰৰ লগতে নিজ মৈদুমীয়া গাঁৱৰ এল পি স্কুলৰ প্ৰধান শিক্ষক পীতাম্বৰ হাজৰিকা ।এই সভাত স্বাস্থ্য কৰ্মী মাণিক গগৈয়ে মেলেৰিয়া আৰু ডেংগু ৰোগৰ বিষয়ে বক্তব্য দাঙি ধৰে । ইয়াত উপস্থিত থকা গৰ্ভৱতী, প্ৰসূতি আৰু কিশোৰীসকলক চাফ-চিকুণকৈ থাকিবলৈ কয় ৱাৰ্ড কমিছনাৰ ধীৰেন গগৈয়ে, কাৰণ ভাল স্বাস্থ্য হ’বলৈ আমাক চাফ-চিকুণকৈ থকা অতি প্ৰয়োজন । ANM অনিমা গগৈয়ে টিকাকৰণ শিশু আৰু গৰ্ভৱতী মহিলাক কিয় কৰা হয় এই বিষয়ে বুজাই দিয়ে ।আশা কৰ্মী জুৰিমা বাইদেৱে গৰ্ভৱতী প্ৰসূতি মাতৃসকলক পুষ্টিকৰ খাদ্য খাবলৈ কয় আৰু কিশোৰীসকলক আইৰন টেবলেট কিয় খাবলৈ লাগে বুজাই দিয়ে ।আজি এই সভাত উপস্থিত এগৰাকী প্ৰসূতি মহিলাক সোধাত কয় যে সভাখনৰ পৰা বহু নজনা বিষয় জানিব পাৰিলো স্বাস্থ্য সম্পৰ্কে। এনেকুৱা সভাত আমি সকলোৱে উপস্থিত থকা অতি প্ৰয়োজন।

- সুৰভি যুৱ সাংবাদিক গোট

অংগনৱাড়ী কেন্দ্রসমূহত শৌচালয়ৰ ওপৰত সমীক্ষা

ডিব্ৰুগড় জিলাৰ পানীতোলা উন্নয়ন খণ্ডৰ অন্তৰ্গত শিয়ালকাটি, হাতিআলি, নাহৰতলি আৰু ডিকমত স্বাস্থ্যৰ লগত সংগতি ৰাখি এক সমীক্ষা চলোৱা হয়। উক্ত সমীক্ষাৰ তথ্যসমূহ উল্লেখ কৰা হ’ল-
১। হাতিআলি ২৬ নং অংগনৱাড়ী কেন্দ্র। শিশুৰ সংখ্যা ৩৭
২। শিয়ালকাটি ২ নং অংগনৱাড়ী কেন্দ্ৰ। শিশু ৩৫ জন।
৩। নাহৰতলি ১ নং কেন্দ্ৰ। শিশু ৩৯।
৪। নাহৰতলি ২ নং কেন্দ্ৰ। শিশু ২৮ জন।
৫। নাহৰতলি ৩ নং কেন্দ্ৰ। শিশু ৪৫ জন।
৬। ডিকম ২ নং কেন্দ্ৰ। শিশু ৪৬ জন।
এক সুস্থ পৰিৱেশতহে শিশুৰ বিকাশ হয়। কিন্তু এই কেন্দ্ৰসমূহত সমীক্ষা চলোৱাৰ পিছত গম পোৱা গ’ল যে সকলোবোৰ কেন্দ্ৰতে শৌচালয় নাই। আৰু যি দুখনত আছে শিশুৰ ব্যৱহাৰৰ উপযোগী নহয়। পানীৰ ফিল্টাৰ নাই। ওচৰৰ কাৰোবাৰ ঘৰৰ পৰা পানীৰ যোগান ধৰা হয়। আনকি টিউবৱেল নাই, যদিও আছে বেয়া হৈ আছে।
শিশুসকলে যদি মুকলিত শৌচ কৰে কিমান ধৰণৰ বীজাণু বিয়পিব তাৰ ফলত শিশুৰ লগতে ওচৰৰ মানুহখিনিৰো বেমাৰ হ’ব। টিউবৱেল নথকাৰ ফলত পানী বেলেগৰ পৰা আনিব লগা হয়। পানী ফিল্টাৰ কৰি খাব পৰা ব্যৱস্থা নাই। পানীত কিমান ধৰণৰ বীজাণু থাকে। এগৰাকী মাতৃ ৰূপা ভূমিজক সোধাত কয় যে, “আমাৰ কেন্দ্ৰৰ বাইদেউসকলে যিমান পাৰে আমাৰ শিশুকেইটাক পৰিষ্কাৰ পৰিৱেশত ৰাখে, কিন্তু আমাৰ কেন্দ্ৰসমূহত শৌচালয়ৰ অভাৱটো সোনকালে পূৰণ কৰিব লাগে। বেয়া হৈ থকা শৌচালয়ৰ পৰাও মানুহৰ বেমাৰ হ’ব পাৰে।’’ এগৰাকী কেন্দ্ৰৰ শিশু খুচীক সোধাত কয় যে “খোৱাৰ আগত সদায় আমাক বাইদেৱে চাবোনেৰে হাত ধুৱায় আৰু য’তে-ত’তে প্ৰস্ৰাৱ কৰিবলৈ নিদিয়ে।” এগৰাকী কৰ্মী মঞ্জু নায়কে কয় যে পানীৰ অসুবিধা আৰু শৌচালয় নথকাৰ ফলত কণ কণ শিশুসকল বিভিন্ন ধৰণৰ সমস্যাৰ সন্মুখীন হ’ব লগা হয়।
আমাৰ ন-জোন যুৱ সাংবাদিক গোটৰ ফালৰ পৰা এটাই অনুৰোধ- শিশুসকলৰ স্বাস্থ্যৰ প্ৰতি যাতে লক্ষ্য ৰাখি বিভাগীয় কৰ্তৃপক্ষেই অতি সোনকালে কিবা পদক্ষেপ হাতত লয় যেন।

- ন-জোন যুৱ সাংবাদিক গোট

বৰষুণ দিলেই ৰাস্তাৰ বিলৈ

কামৰূপ জিলাৰ ৰামপুৰ উন্নয়ন খণ্ডৰ অন্তৰ্গত ফুটুৰী গাঁৱৰ পৰা মথাউৰিলৈ যোৱা ৰাস্তাটোৰ অৱস্থা অতি শোচনীয়। প্ৰকাণ্ড প্ৰকাণ্ড গাঁতৰ বাবে অলপ বৰষুণ দিলে পানী জমা হয়। এই ৰাস্তাৰে হেজাৰ হেজাৰ মানুহ অহা-যোৱা কৰে। এই ৰাস্তাটো পকী নকৰা বাবে অলপ বৰষুণ হ’লে গাড়ী-চাইকেল দূৰৰে কথা, খোজ কাঢ়ি অহা-যোৱা কৰিবলৈও বহু কষ্ট হয়। এই বিষয়ে আফ্ৰিজুল আহমেদে কয় যে ৰাস্তাটো পকী নকৰা বাবে বৰষুণৰ বতৰত বিদ্যালয়লৈ অহা-যোৱা কৰিবলৈ অসুবিধা হয়। এই বিষয়ে ৰুণমণি বেগমে কয় যে পকী নকৰা বাবে চাইকেল, গাড়ী-মটৰ আদি অহা-যোৱা কৰিবলৈ অসুবিধা হয়। এই বিষয়ে আৰু আজাহাৰ আলীয়ে কয় যে যদি কেতিয়াবা কাৰোবাৰ বেমাৰ হয় আকস্মিকভাৱে চিকিৎসালয়লৈ যোৱাৰ বাবে অসুবিধা হয়, যিহেতু ৰাস্তাটো পকী কৰা নাই। গতিকে, যদি এই ৰাস্তাৰ পকীকৰণ কাৰ্য সমাধান হয় তেন্তে অহা-যোৱা বা যাতায়াত ব্যৱস্থাটো সুচল হ’ব আৰু বহু সুবিধা হ’ব।

- নীল আকাশ 'যুৱ সাংবাদিক গোট
ম: আচিক আহমেদ (১১ বছৰ)

আইৰন টেবলেটৰ প্ৰয়োজনীয়তা

ডিব্ৰুগড় জিলাৰ পানীতোলা উন্নয়ন খণ্ডৰ অন্তৰ্গত চাবুৱা চাহ বাগিচাৰ (টাটা গেট) অৱস্থিত ৬ নং লাইনৰ ২ নং অংগনৱাড়ী কেন্দ্ৰৰ কৰ্মীৰ লগত আইৰন টেবলেটৰ প্ৰয়োজনীয়তাৰ বিষয়ে সাক্ষ্যৎকাৰ লোৱা হয়। কেন্দ্ৰৰ কৰ্মী জ্ঞানী কোঁৱৰ তাঁতী বাইদেউক সোধাত কয় যে তেওঁলোকৰ কিশোৰীৰ সংখ্যা ৭২ জনী আৰু প্ৰসূতি মাতৃৰ সংখ্যা ১২ গৰাকী। তেওঁ কয় যে আইৰন টেবলেট প্ৰতি সপ্তাহত ৬টাকৈ এগৰাকী কিশোৰীক দিয়া হয়। আইৰন টেবলেট নাখালে বহুত ধৰণৰ বেমাৰ-আজাৰ হ’ব পাৰে। আইৰন টেবলেটে মানুহৰ শৰীৰত আইৰনৰ পৰিমাণটো কমিবলৈ নিদিয়ে।
এই সন্দৰ্ভত এগৰাকী কিশোৰী মেহেন্দী তাঁতীক সোধাত তাই কয় যে আগতে মাহেকীয়া সময়মতে হোৱা নাছিল আৰু বহুত দুৰ্বল অনুভৱ কৰিছিলো। কিন্তু আইৰন টেবলেট খোৱাৰ পিছৰ পৰা সময়মতে মাহেকীয়া হয় আৰু দুৰ্বলতাও কম হ’ল। আইৰন টেবলেটে ৰক্তহীনতা ৰোগৰ পৰা ৰক্ষা কৰে।

- বিনীতা পাতৰ
ন-জোন যুৱ সাংবাদিক গোট

আকাশ

আকাশখন ইমান সুবিশাল
লাগে বৰ ভাল
জোন, বেলি, তৰা আদি
একোটা পৰিয়াল
ৰাতি আকাশখন চন্দ্ৰৰ বাবে
হৈ থাকে ৰূপহী ৰঙৰ
দিনত কিন্তু সূর্য হাকিম
কৰে পৃথিৱী উজ্জ্বল
আঠোটা গ্ৰহ আৰু সূর্য মিলি
কৰে আকাশ মনোমোহা
আৰু সিঁহতৰ লগত থাকে
অসংখ্য সৰু তৰা।

- গীতাঞ্জলি বৰাইক
বৰ্হমথুৰি যুৱ সাংবাদিক গোট

নিয়ৰ

নিয়ৰ সৰে ৰাতিপুৱা
নিয়ৰ সৰে ৰাতি
দিনত যায় আকাশলৈ
পঢ়িবলৈ বুলি
নিয়ৰবোৰে লয় চাগে
ৰঙা-নীলা ছাতি
আহিন মাহত দূবৰি বন
থাকে নিয়ৰত তিতি
কাতি মাহত আকাশ বন্তি
জ্বলে শাৰী শাৰী
আঘোণ মাহত সোণালী
ধান থাকে পথাৰ ভৰি
সন্ধিয়া পৰত থাকে জিলিকি।

- গৰিমা সন্দিকৈ
মৰমী যুৱ সাংবাদিক গোট

ফুল

ভাল লাগে ফুল মোৰ
বাৰে বৰণীয়া
ভাল লাগে ফুল মোৰ
গোন্ধত আমোল-মোল
ভাল লাগে ফুল মোৰ
ভাল লগে ফুল মোৰ
পখিলাই ফুলৰ ৰস চোহা দেখি।

- জ্যোতিস্মৃতা বৰুৱা
মৰমী যুৱ সাংবাদিক গোট